სახელმძღვანელოების გრიფირების პროცესთან დაკავშირებით შესაძლო დარღვევებზე განათლების სამინისტრო დასკვნას სავარაუდოდ, სექტემბრის ბოლოს გამოაქვეყნებს. ამის შესახებ განათლების, მეცნიერების, კულტურისა და სპორტის მინისტრმა მიხეილ ბატიაშვილმა განაცხადა, რომელმაც გრიფირების პროცესთან დაკავშირებით დაწყებულ შესწავლაზე კომენტარი გააკეთა.
მინისტრის თქმით, დარღვევების გამოვლენის შემთხვევაში სამინისტროს რეაგირება მკაცრი იქნება, რადგან ბავშვების სახელმძღვანელოებზეა საუბარი. შესწავლის პროცესი კი ჯერ არ დასრულებულა.
"სექტებრის ბოლოს ველოდებით საბოლოო დასკვნას, რადგან გამომცემლობებიდან, სახელმძღვანელოების ავტორებიდან კიდევ შემოდის წერილები. ამიტომ, რადგანაც ისინი აგრძელებენ ასეთი მასალების მოწოდებას, სავარაუდოდ, თვის ბოლომდე წარმოვადგენთ დასკვნას, სადაც საუბარი იქნება ყველა იმ დარღვევაზე, შეცდომაზე, რომელიც ამ პროცესში იყო დაშვებული. მთავარი ის არის, რომ ეს პროცესი ისე უნდა გამოვასწოროთ, მომავალში ასეთ სასწრაფო რეჟიმში არ მოგვიწიოს მუშაობა და განახლებული სახელმძღვანელოები ჰქონდეთ ბავშვებს. ამიტომ, დასკვნა იქნება ძალიან ობიექტური, გამჭვირვალე და გვექნება შედეგები. თუ ამ პროცესში კონკრეტული პირები გამოიკვეთება და გარკვეული ხარვეზები გამოვლინდება, შესაბამის ორგანოებში იქნება წარდგენილი. სამინისტრო მიიღებს გადაწყვეტილებას - ყველა იმ ხარვეზებზე, რაზეც იყო საუბარი, კონკრეტული დასკვნა იქნება წარმოდგენილი", - განაცხადა ბატიაშვილმა.
მისი თქმით, საჭიროა დაველოდოთ საბოლოო დასკვნას და სამინისტროს ზომები და ნაბიჯები იქნება უმკაცრესი.