საგარეო საქმეთა მინისტრი დავით ზალკალიანი მიიჩნევს, რომ ახალგორში რუსული სკოლის გახსნა ფაქტობრივი ანექსია და ოკუპაციის გაგრძელებაა.

მინისტრის შეფასებით, მსგავსი ფაქტები ფიქსირდება ოკუპირებულ აფხაზეთშიც, სადაც აქტიურად მიმდინარეობს ქართული ენის აკრძალვა.

„ახალგორში რუსული სკოლის გახსნა არის ფაქტობრივი ანექსიის და ოკუპაციის გაგრძელება. ეს არის იმ უკანონო პროცესის ნაწილი, რომელიც მიმდინარეობს ოკუპირებულ ტერიტორიებზე როგორც ცხინვალის რეგიონში, ასევე მსგავსი ფაქტები გვაქვს ოკუპირებული აფხაზეთის ტერიტორიაზე, სადაც აქტიურად მიმდინარეობს ქართული ენის აკრძალვა. ბუნებრივია, ეს არის საერთაშორისო ნორმების უხეში დარღვევა, რომელზეც მუდმივად ვასუბრობთ. მთავარი გზავნილი ჩვენი სტრატეგიული პარტნიორების მიმართ არის ის, რომ ეს საკითხი მუდმივად იყოს რუსეთთან მათი ურთიერთობის დღის წესრიგში“, - განაცხადა ზალკალიანმა.