პერსონალური სახელმწიფო დაცვით სარგებლობა, სავარაუდოდ, პარლამენტის ყოფილ თავმჯდომარესაც შეეზღუდება. დღეს მოქმედი რეგლამენტით, პარლამენტის ყოფილი თავმჯდომარე უზრუნველყოფილია სახელმწიფო დაცვით ახალი მოწვევის პარლამენტის უფლებამოსილების ვადით.
მთავრობის ინიციატივით “სახელმწიფო დაცვის სპეციალური სამსახურის შესახებ“ კანონში დაგეგმილი ცვლილებების მიხედვით კი, პარლამენტის თავმჯდომარეს პერსონალური სახელმწიფო დაცვა უფლებამოსილების გასვლიდან ერთი წლის ვადით შეუნარჩუნდება.
ამავე ცვლილებებით, იგივე წესი გავრცელდება პრეზიდენტზე, რომელსაც ჯერ კიდევ მოქმედი კანონით სახელმწიფო დაცვა სიცოცხლის ბოლომდე ეკუთვნის და ასევე, ყოფილ პრემიერ-მინისტრზე.
ამასთან, პროექტის მიხედვით, ყოფილ უმაღლესი სახელმწიფო თანამდებობის პირებს სახელმწიფო დაცვა იმ შემთხვევაში შეუნარჩუნდებათ, თუკი მათ სიცოცხლესა და ჯანმრთელობას საფრთხე ემუქრება. ამაზე გადაწყვეტილება მთავრობამ უნდა მიიღოს.
კანონპროექტი სახელმწიფო დაცვის სპეციალურმა სამსახურმა მოამზადა და ის განსახილველად მთავრობამ პარლამენტს უკვე წარუდგინა.