მნიშვნელოვანია საქართველომ და დასავლეთმა დაიცვას ერთობლივი ღირებულებები, - ამის შესახებ საქართველოს თავდაცვის მინისტრმა ლევან იზორიამ მაკკეინის ინსტიტუტის მიერ ორგანიზებულ საერთაშორისო კონფერენციაზე „მსოფლიო თავდაყირა 2018“ განაცხადა.

კონფერენციის მოდერატორმა თავდაცვის მინისტრს მიმართა, შეეფასებინა საქართველოსა და ნატო-ს ურთიერთობები და სამომავლო გეგმები.

„ჩვენ კონკურენტულ გარემოში ვცხოვრობთ, სადაც დასავლეთი უპირისპირდება ავტორიტარიზმს. ამ ფონზე რუსეთი არის სერიოზული გამოწვევა. საქართველო არის დასავლეთის განუყოფელი ნაწილი და საქართველო გახდება ნატო-ს და ევროკავშირის წევრი. დღეს ჩვენი ამოცანა არის, როგორც საკუთარი თავის, ისე დასავლეთის გაძლიერება. მხოლოდ ასე მოვერევით იმ საფრთხეებს, რაც რუსეთის მხრიდან მოდის. ამ ფონზე მნიშვნელოვანია საქართველომ და დასავლეთმა დაიცვან ერთობლივი ღირებულებები. მნიშვნელოვანია არა სტრატეგიული მოთმინება, არამედ სტრატეგიული მზაობა. საქართველო მზად უნდა იყოს ნატო-ში შესვლისთვის", - განაცხადა ლევან იზორიამ.