საქართველოს პრემიერ-მინისტრი ლიეტუვის საგარეო საქმეთა მინისტრს შეხვდა

საქართველოს პრემიერ-მინისტრი მამუკა ბახტაძე ლიეტუვის რესპუბლიკის საგარეო საქმეთა მინისტრ ლინას ლინკევიჩიუსს შეხვდა, რომელიც თბილისში სამუშაო ვიზიტით იმყოფება, - ამის შესახებ „ინტერპრესნიუსს“ პრემეირ-მინისტრის პრესსამსახურიდან აცნობეს.

პრემიერმა ლინას ლინკევიჩიუსს ვიზიტისა და თბილისის საერთაშორისო კონფერენციაში მონაწილეობისთვის მადლობა გადაუხადა. მხარეებმა ისაუბრეს ორი ქვეყნის მჭიდრო თანამშრომლობაზე, მათ შორის, საქართველოს ევროპული და ევროატლანტიკური ინტეგრაციის პროცესში. პრემიერ-მინისტრმა აღნიშნა, რომ ამ მიმართულებით ლიეტუვის მნიშვნელოვან მხარდაჭერას საქართველოს მთავრობა განსაკუთრებულად აფასებს.

ყურადღება გამახვილდა საქართველო-ევროკავშირის თანამშრომლობის დღის წესრიგის მნიშვნელოვან საკითხებზე, მათ შორის ევროკავშირში ინტეგრაციის საგზაო რუკის შემუშავების პროცესზე.

საუბარი ასევე შეეხო ორმხრივი ურთიერთობების განვითარების პოზიტიურ დინამიკას და სამომავლო თანამშრომლობის პერსპექტივებს.

მთავრობის მეთაურმა ხაზგასმით აღნიშნა ლიეტუვის მტკიცე მხარდაჭერა საქართველოს ტერიტორიული მთლიანობისა და სუვერენიტეტისადმი და აღნიშნა, რომ ამის კიდევ ერთი მკაფიო დადასტურება იყო რუსეთ-საქართველოს ომის ათი წლისთავთან დაკავშირებით ლიეტუვის საგარეო საქმეთა მინისტრის ვიზიტი საქართველოში.

მთავრობის ადმინისტრაციაში გამართულ შეხვედრას საქართველოს საგარეო საქმეთა მინისტრი დავით ზალკალიანი დაესწრო.

დავით უსუფაშვილი - „გერმანული მოდელი“ სწორედ იმიტომ იქნა შერჩეული, რომ იგი ყველაზე ადეკვატური კონტრნაბიჯია, რათა პროცესები კონტროლიდან არ გამოვიდეს
ქართული პრესის მიმოხილვა 19.11.2019
ზაზა ფირალიშვილი - უბრალოდ, ივანიშვილს  ვერ წარმოუდგენია, რომ თავადაც ძველი ხელისუფლების მსგავსი შეცდომები მოსდის