ეს არის კიდევ ერთი ძალიან მნიშვნელოვანი მხარდამჭერი დოკუმენტი, რომელიც ასახავს ევროკავშირის დამოკიდებულებას საქართველოს მიმართ და განსაკუთრებით მნიშვნელოვანია ამ დოკუმენტში იმ საკითხის ასახვა, რაც არის დაკავშირებული არჩილ ტატუნაშვილის და გიგა ოთხოზორიას მკვლელობასთან, - ასე აფასებს საქართველოს პარლამენტის თავმჯდომარე ევროპის საბჭოში ევროკავშირის დელეგაციის განცხადებას.
ირაკლი კობახიძის თქმით, განცხადებაში სწორედ ის საკითხებია ასახული, რაც საქართველოს პარლამენტის რეზოლუციაში და მკაფიო მითითებებია იმასთან დაკავშირებით, თუ როგორ უნდა იმოქმედოს რუსეთის ფედერაციამ.
„არის ძალიან მკაფიო მითითებები გაკეთებული იმასთან დაკავშირებით, თუ როგორ უნდა იმოქმედოს რუსეთის ფედერაციამ. საუბარია, ერთ შემთხვევაში, გამოძიებაზე, მეორე შემთხვევაში, სამართლის აღსრულებაზე. ეს არის ზუსტად ის საკითხები, რომელიც ჩვენ ჩვენს საპარლამენტო რეზოლუციაში ავსახეთ და მოხარული ვართ, რომ ჩვენი რეზოლუციის ეს ჩანაწერები უკვე ევროპულ დოკუმენტში აისახა“,- განაცხადა პარლამენტის თავმჯდომარემ.
ევროკავშირი საქართველოს რეგიონებში- აფხაზეთში და „სამხრეთ ოსეთში“ რუსეთის უკანონო სამხედრო ყოფნის, სამხედრო სწავლების ჩატარებისა და სამხედრო ინფრასტრუქტურის გაძლიერების გამო შეშფოთებას გამოთქვამს. ამის შესახებ ევროპის საბჭოში ევროკავშირის დელეგაციის განცხადებაშია ნათქვამი.
განცხადების თანახმად, რუსეთის მიერ აფხაზეთისა და სამხრეთ ოსეთის ე.წ. დამოუკიდებლობის აღიარება და შემდგომი ქმედებები ცხადყოფს, რომ რუსეთი პატივს არ სცემს მეზობლების სუვერენიტეტსა და ტერიტორიულ მთლიანობას და წესებზე დაფუძნებულ საერთაშორისო სისტემას.
ამასთან, ევროკავშირი არჩილ ტატუნაშვილის გარდაცვალების საქმეზე სათანადო გამოძიებას და გიგა ოთხოზორიას მკვლელობაზე მართლმსაჯულების აღსრულებას მოითხოვს.