დავით კოდუა - სუს-ში კითხვები ეხებოდა ჩემს უფლებამოვალეობებს, თუ რას ვსაქმიანობდი გუბერნატორის მოადგილედ ყოფნის პერიოდში, სხვა თემაზე შეკითხვები არ დასმულა

სამეგრელო-ზემო სვანეთის ყოფილი გუბერნატორის ყოფილი მოადგილე დავით კოდუა სახელმწიფო უსაფრთხოების სამსახურის ზუგდიდის განყოფილებიდან გამოვიდა. კოდუას თქმით, უწყებას კითხვები ჰქონდა იმასთან დაკავშირებით, თუ რას საქმიანობდა ის გუბერნატორის მოადგილის პოზიციაზე ყოფნის პერიოდში.

"კითხვები ეხებოდა ჩემს უფლებამოვალეობებს, თუ რას ვსაქმიანობდი გუბერნატორის მოადგილედ ყოფნის პერიოდში. სხვა თემასთან დაკავშირებით კითხვები არ დასმულა", - განუცხადა კოდუამ ჟურნალისტებს.

მისი ინფორმაციით, უწყებაში შესაძლო ქრთამის აღების ფაქტზე დაწყებულ გამოძიებასთან დაკავშირებით ის არ დაუბარებიათ და აღნიშნულთან არანაირი კავშირი არ აქვს. კოდუას გამოკითხვა 4 საათის განმავლობაში მიმდინარეობდა.