“შრომის უსაფრთხოების შესახებ“ კანონის კონტროლს ეკონომიკური საქმიანობის ყველა სფერო დაექვემდებარება. ამასთან, აღნიშნული კანონი ორგანული კანონის სტატუსს შეიძენს, როგორც ამას ახალი რედაქციის კონსტიტუცია ითხოვს.

“შრომის უსაფრთხოების შესახებ“ ახალი - ორგანული კანონის პროექტი პარლამენტის ბიუროს უახლოეს სხდომაზე წარედგინება. პარლამენტის მიერ მიმდინარე წლის მარტში მიღებული “შრომის უსაფრთხოების შესახებ“ კანონის მოქმედების სფერო შეზღუდულია და ის მხოლოდ მომეტებული საფრთხის შემცველ, მძიმე, მავნე და საშიშპირობებიან სამუშაოებზე ვრცელდება. პარლამენტში განსახილველად წარდგენილი პროექტის მიხედვით კი, “შრომის უსაფრთხოების შესახებ“ ორგანული კანონი ეკონომიკური საქმიანობის ყველა დარგის მიმართ, მათ შორის “შრომის კოდექსით“ და “საჯარო სამსახურის შესახებ“ კანონით მოწესრიგებული შრომითი ურთიერთობის მიმართ გავრცელდება.

გარდა ამისა, კიდევ ერთი სიახლეა შრომის ინსპექციის გაძლიერება და სამუშაო ადგილებზე ინსპექტორების უპირობო დაშვება. “კანონის მოქმედება საქმიანობის ყველა სფეროზე გავრცელდება. მომზადებული პროექტით ფართოვდება შრომის ინსპექციის უფლებამოსილებები - შეტყობინებებზე რეაგირებისათვის მათ სასამართლოს თანხმობის გარეშე შესვლის უფლება ექნებათ. გარდა ამისა, შრომის ინსპექციის უფლებამოსილება ასევე გავრცელდება შრომით უფლებებზე“, - განუცხადა “ინტერპრესნიუსს“ პროექტის ერთ-ერთმა ინიციატორმა, პარლამენტის ჯანდაცვის კომიტეტის თავმჯდომარემ აკაკი ზოიძემ.

აკაკი ზოიძესთან ერთად, კანონპროექტის ინიციატორები არიან: დიმიტრი ცქიტიშვილი, სოფიო კილაძე და თამარ ხულორდავა.