პრეზიდენტის საპარლამენტო მდივანმა ანა ნაცვლიშვილმა სახელმწიფო დაცვის სპეციალური სამსახურის შესახებ კანონში დაგეგმილი ცვლილებები, რომლის მიხედვით, პრეზიდენტს სახელმწიფო დაცვა სიცოცხლის ბოლომდე აღარ ეყოლება, თავდაცვისა და უშიშროების კომიტეტის სხდომაზე გააპროტესტა.

ანა ნაცვლიშვილმა კიდევ ერთხელ აღნიშნა, რომ გადაწყვეტილება პოლიტიკურად მოტივირებულია.

„ეს მწირი დასაბუთება გვარწმუნებს, რომ სამწუხაროდ, სახელმწიფო მეთაურის, უმაღლესი მთავარსარდლის უსაფრთხოების სისტემის მოშლასთან გვაქვს საქმე, აქ სახელმწიფოს ინსტიტუტებია სასწორზე და არა ვინმეს პირადი სურვილი, რომ დადიოდეს სახელმწიფო დაცვით“, - განაცხადა ანა ნაცვლიშვილმა.

ნაცვლიშვილის პასუხად სახელმწიფო დაცვის სპეციალური სამსახურის ხელმძღვანელმა ანზორ ჩუბინიძემ განმარტა, რომ სახელმწიფო დაცვის სპეციალური სამსახური ყოფილი უმაღლესი სახელმწიფო თანამდებობის პირების დაცვაზე პასუხისმგებლობას არ იხსნის, მაგრამ ეს საჭიროების მიხედვით, რისკების შეფასების საფუძველზე მოხდება.

კომიტეტმა სახელმწიფო დაცვის სპეციალური სამსახურის საკანონმდებლო ინიციატივას პირველი მოსმენით მხარი დაუჭირა.

შეგახსენებთ, რომ ყოფილი პრემიერი, პრეზიდენტი და პარლამენტის თავმჯდომარე სახელმწიფომ, შესაძლოა, დაცვის ნაცვლად ტრანსპორტით და მძღოლით უზრუნველყოს.