ჰააგის საერთაშორისო სასამართლომ აშშ-ს ირანის წინააღმდეგ დაწესებული სანქციების ნაწილის გაუქმება დაავალა. საუბარია იმ სანქციებზე, რომლებიც ჰუმანიტარული პროდუქციის იმპორტს და სამოქალაქო ავიაციის უსაფრთხოებასთან დაკავშირებულ საქონელსა და მომსახურებას ეხება.
წინასწარ დადგენილებაში, რომელიც სასამართლომ დღეს გამოიტანა, ნათქვამია, რომ ვაშინგტონმა ნებისმიერი გზით უნდა გააუქმოს ყველა შეზღუდვა და აღადგინოს ირანისთვის მედიკამენტებისა და სამედიცინო აპარატურის, საკვები პროდუქტების და სასოფლო-სამეურნეო საქონლის და სამოქალაქო ავიაციის უსაფრთხოების უზრუნველყოფისთვის საჭირო სათადარიგო ნაწილებისა და აღჭურვილობის მიწოდება.
შეგახსენებთ, რომ აშშ-ს პრეზიდენტმა დონალდ ტრამპმა ირანის წინააღმდეგ სანქციები მიმდინარე წლის მაისში, ირანის ბირთვულ პროგრამასთან დაკავშირებული შეთანხმებიდან ცალმხრივი გასვლის შემდეგ დააწესა. ივლისში ირანმა აშშ-ს წინააღმდეგ საჩივარი ჰააგის საერთაშორისო სასამართლოში შეიტანა.
სავარაუდოდ, აშშ ჰააგის საერთაშორისო სასამართლოს დადგენილებას გაასაჩივრებს.