ოპოზიციური გაერთიანების „ძალა ერთობაშია“ საპრეზიდენტო კანდიდატი გრიგოლ ვაშაძე „რესპუბლიკელების“ ერთ-ერთ ლიდერს ლევან ბერძენიშვილს მიმართავს. ვაშაძე განცხადებას „ფეისბუკის“ პირად გვერდზე ავრცელებს და ლევან ბერძენიშვილს გაერთიანებას სთავაზობს. ვაშაძე აღნიშნავს, რომ ის ბერძენიშვილს ყოველთვის თვლიდა საბჭოთა კავშირის წინააღმდეგ და საქართველოს თავისუფლებისათვის მებრძოლ პატრიოტად.
„ბატონო ლევან, დატვირთული საარჩევნო კამპანიის და რეგიონებში შეხვედრების გამო, სამწუხაროდ, ვერ მოვახერხე დღემდე პასუხის გაცემა. მინდა გითხრათ, რომ მე ყოველთვის გთვლიდით საბჭოთა კავშირის წინააღმდეგ და საქართველოს თავისუფლებისათვის მებრძოლ პატრიოტად.
დადგა დრო გაერთიანებისა, რათა ხელისუფლებაში მოვიდეს ეროვნული კოალიციური მთავრობა, რომელიც ერთხელ და სამუდამოდ დაამკვიდრებს პოლიტიკური კონკურენციის დემოკრატიულ წესებს და უზრუნველყოფს ჩვენი სახელმწიფოს წარმატებას და ღირსეულ მომავალს“, - აღნიშნავს გრიგოლ ვაშაძე.