გაერთიანებული ოპოზიციის „ძალა ერთობაშია" საპრეზიდეტო კანდიდატი გრიგოლ ვაშაძე საოკუპაციო ხაზთან მდებარე სოფელი ხურვალეთიდან ოკუპანტების მიერ გატაცებული მაია ოთინაშვილის ოჯახში მივიდა, - ამის შესახებ „ინტერპრესნიუსს“ გაერთიანებული ოპოზიციიდან აცნობეს.

ოჯახის წევრების განცხადებით, მაია ოთანაშვილი არაოკუპირებული ტერიტორიიდან, მათი საკარმიდამო ეზოდან გაიტაცეს. მათივე თქმით, მოსახლეობის უსაფრთხოება დაცული არ არის და ამ ტერიტორიებიდან გატაცება ხშირად ხდება.

გრიგოლ ვაშაძის განცხადებით, გაერთიანებული ოპოზიცია გამოიყენებს ყველა საშუალებას ჩვენს პარტნიორებთან ამ ფაქტის აქტუალიზაციისათვის.

მისივე თქმით, საქართველოს ხელისუფლება უუნაროა და არ დგამს შესაბამის ნაბიჯებს მოქალაქეთა უსაფრთხოების დასაცავად, „ქართული ოცნების“ დათმობის პოლიტიკის შედეგად გაძლიერდა რუსეთის აგრესიული ნაბიჯები. გრიგოლ ვაშაძის აზრით, სასწრაფოდ გასაძლიერებელია საპოლიციო ძალები ოკუპაციის ხაზის გასწვრივ.