სამოქალაქო მოძრაობა „მრავალეროვანი საქართველოს“ ორგანიზებით, პრეზიდენტობის კანდიდატებთან შეხვედრები გაიმართება. შეხვედრებში მონაწილეობას მიიღებენ სამცხე-ჯავახეთისა და ქვემო ქართლის რეგიონებიდან მოწვეული ადგილობრივი სამოქალაქო სექტორისა და მედიის წარმომადგენლები, ასევე საზოგადოებრივი აზრის ლიდერები.
„მიმდინარე წლის 7 ოქტომბერს, სასტუმრო „მუზეუმში“ გაიმართება შეხვედრები პრეზიდენტობის კანდიდატებთან: დავით ბაქარაძესთან, შალვა ნათელაშვილთან და დავით უსუფაშვილთან. შეხვედრები მიზნად ისახავს სამცხე-ჯავახეთისა და ქვემო ქართლის რეგიონებში მცხოვრები ეთნიკური უმცირესობების ინფორმირებულობის დონის ამაღლებას პრეზიდენტობის კანდიდატების პოლიტიკური ხედვებისა და საპროგრამო პრინციპების თაობაზე. შეხვედრები გაიმართება „ეროვნული ღვაწლი დემოკრატიისათვის“ (NED) ფინანსური მხარდაჭერით“, - ნათქვამია „მრავალეროვანი საქართველოს“ მიერ გავრცელებულ ინფორმაციაში.