საქართველოში კანაფის მოყვანა-კულტივაციის იდეას პარლამენტში რეალური მხარდაჭერა არ აქვს - მგონია, რომ მთავრობის მიერ ინიცირებულ პროექტს პარლამენტი მხარს არ დაუჭერს, - ამის შესახებ „ინტერპრესნიუსს“ „ქართული ოცნების“ დეპუტატმა გედევან ფოფხაძემ განუცხადა.

„რაოდენობრივად ვერ დავაკონკრეტებ, რამდენი დეპუტატი შეიძლება უჭერდეს მხარს და რამდენი შეიძლება იყოს წინააღმდეგი. ჩემი ინფორმაციით, მოწინააღმდეგეთა რაოდენობა საკმაოდ დიდია. მგონია, რომ ეს იდეა მისაღები არ არის. შესაბამისად, კანონპროექტის ამ ფორმით განხილვა არაფრის მომტანი არ უნდა იყოს, რადგან მას პარლამენტის მხარდაჭერა არ ექნება. იმ შემთხვევაში თუ რაიმე ახალი არგუმენტები გამოჩნდება, რომლითაც ბოლომდე დასაბუთდება იდეა და კითხვებს ამომწურავად გაეცემა პასუხი, შესაძლებელია პროექტის განხილვა მომავალში დაიწყოს“, - განუცხადა „ინტერპრესნიუსს“ გედევან ფოფხაძემ.

ცნობისთვის, კანაფის კონტროლის შესახებ კანონპროექტის და მისგან გამომდინარე საკანონმდებლო ცვლილებების განხილვა პარლამენტმა ორი თვით გადაავადა.