ავღანეთში, ჰელმანდის პროვინციაში აფეთქების შედეგად დეპუტატობის კანდიდატი ჯაბარ ქაჰრამანი დაიღუპა და 7 ადამიანი დაშავდა. ამის შესახებ ტელეარხი TOLOnews ადგილობრივ ხელისუფლებაზე დაყრდნობით იუწყება.

პროვინციის გუბერნატორის ომარ ზვაკის განცხადებით, აფეთქება ქალაქ ლაშქარგაჰში დღეს დილით მოხდა. დაშავებულები საავადმყოფოებში გადაიყვანეს.

ზვაკის თქმით, ასაფეთქებელი ნივთიერება დეპუტატობის კანდიდატის სავარძელში იყო მოთავსებული.

საპარლამენტო არჩევნები ავღანეთში 20 ოქტომბერს გაიმართება.

შეგახსენებთ, რომ არასტაბილური სიტუაციის გამო, ბოლოს საპარლამენტო არჩევნები ავღანეთში 2010 წელს ჩატარდა.