საქართველოს ჯანდაცვის მინისტრი დავით სერგეენკო კანაფის კულტივაციასთან დაკავშირებული კანონპროექტის უკან გაწვევის გადაწყვეტილებაში მეორე ტურთან კავშირს ვერ ხედავს. როგორც სერგეენკომ მთავრობის სხდომის დასრულების შემდეგ განაცხადა, კულტივაციასთან დაკავშირებით ინტენსიური მსჯელობა ჯერ კიდევ პირველ ტურამდე იყო.

„მე არ ვფიქრობ, რომ ეს მეორე ტურთან არის კავშირში. კულტივაციასთან დაკავშირებით პირველ ტურამდეც ინტენსიური მსჯელობა იყო. აქედან გამომდინარე, ჩემს წარმოდგენაში ვერ ვაკავშირებ მაინცდამაინც მეორე ტურთან, ეს უფრო კავშირშია საზოგადოების რეაქციასთან",- განაცხადა სერგეენკომ.

შეგახსენებთ, კანაფის კონტროლის შესახებ საკანონმდებლო პაკეტი პარლამენტიდან იქნება გაწვეული. აღნიშნული ცნობილი შინაგან საქმეთა მინისტრის გიორგი გახარიას და პარლამენტის თავმჯდომარე ირაკლი კობახიძის კათოლიკოს-პატრიარქთან შეხვედრის შემდეგ გახდა ცნობილი.