ანკარა მიიჩნევს, რომ ირანის წინააღმდეგ აშშ-ს სანქციები სწორი ნაბიჯი არ არის და მსოფლიოში ბალანსს არღვევს, - ამის შესახებ თურქეთის პრეზიდენტმა რეჯეფ თაიფ ერდოღანმა განაცხადა.

„ჩვენ არ მივიჩნევთ ამ სანქციებს სწორად. ეს ნაბიჯი მსოფლიო ბალანსის დარღვევაზეა მიმართული. ეს ნაბიჯი ეწინააღმდეგება საერთაშორისო სამართალს. ჩვენ არ გვსურს იმპერიალისტურ მსოფლიოში ცხოვრება. ჩვენ არ დავემორჩილებით ამგვარ სანქციებს“, - აღნიშნა თურქეთის ლიდერმა.

აშშ-მა ირანის 700-ზე მეტი ფიზიკური და იურიდიული პირი სასანქციო სიაში შეიყვანა.

5 ნოემბრიდან აშშ-მა ირანთან მიმართებაში სანქციები სრულად აამოქმედა, რაც აშშ-ის ირანის ბირთვული პროგრამის შესახებ შეთანხმებიდან გამოსვლას უკავშირდება. სანქციების ახალი ტალღა ეხება ენერგეტიკულ სექტორს და, ასევე, ნავთობთან დაკავშირებულ გარიგებებსა და ირანის ცენტრალურ ბანკთან ტრანზაქციებს.

მიმდინარე წლის 8 მაისს აშშ-ის პრეზიდენტმა დონალდ ტრამპმა ირანის ბირთვული პროგრამის შესახებ შეთანხმებიდან გამოსვლის თაობაზე განცხადება გააკეთა. მან პირობა დადო, რომ აშშ არა მხოლოდ აღადგენს ძველ სანქციებს, არამედ ახალ სანქციებსაც დაუწესებს ირანს. მისივე თქმით, ვაშინგტონი მზად არის ახალი შეთანხმება დადოს ირანთან, ნაცვლად იმ შეთანხმებისა, რომელიც წინა ადმინისტრაციის დროს იყო დადებული.