„მე ვერც გრიგოლ ვაშაძის სიარულს ვხედავ,“ - ასე უპასუხა პარლამენტის ვიცე-სპიკერმა გია ვოლსკიმ ჟურნალისტების კითხვას იმასთან დაკავშირებით, თუ რატომ აღარ ჩნდება სალომე ზურაბიშვილი მედიასთან და რატომ არ ხვდება ამომრჩეველს. ამ კითხვას გია ვოლსკიმ გრიგოლ ვაშაძის მიერ გაკეთებული განცხადების კრიტიკით უპასუხა და აღნიშნა, რომ მას გრიგოლ ვაშაძის სხვა მნიშვნელოვანი შეხვედრა არ ახსოვს, გარდა „როყიო განცხადებებისა“. გია ვოლსკის თქმით, სალომე ზურაბიშვილიც დაიწყებს შეხვედრებს.

„მე ვერც მისი კონკურენტის სიარულს ვხედავ. მისი კონკურენტის არაორაზროვანი განცხადება იყო გავრცელებული იმის თაობაზე, რომ არავითარი კონსტიტუცია მას არ აინტერესებს და არც ერთი კითხვა არ დასმულა იმასთან დაკავშირებით, რომ გრიგოლ ვაშაძე დაპირისპირების ორგანიზებას აპირებს, რამაც მისი აზრით, უნდა შეცვალოს ხელისუფლება. ეს არის კონსტიტუციური უფლებამოსილებების აბსოლუტური გაუთვალისწინებლობით გაცხადებული. ვფიქრობ, რომ ეს საყურადღებოა. არ მახსოვს გრიგოლ ვაშაძეს ბოლო პერიოდში სხვა მნიშვნელოვანი შეხვედრა ჰქონოდეს თუ არა ასეთი როყიო განცხადებები.

სალომე ზურაბიშვილიც დაიწყებს, რასაკვირველია, შეხვედრებს, ჩამოყალიბდება. ჩვენთან ერთად კონსულტაციებს გადის საარჩევნო სისტემაში ჩართულ აქტივისტებთან და საკვანძო ფიგურებთან ერთად,“ - განაცხადა გია ვოლსკიმ.