ქეთევან ციხელაშვილი - არ შევეგუებით, არ გავტყდებით, არ შევწყვეტთ მშვიდობიან ბრძოლას, ვიდრე სამარცხვინო მავთულხლართების ბოლო მეტრი არ დაიშლება ჩვენი ქვეყნის ტერიტორიაზე

ჩვენს ხელთ არსებული ყველა ბერკეტი უკვე ამოქმედებულია - ცხელი ხაზიც, რუსებთან კომუნიკაციაც, ჩვენ პარტნიორებთან კომუნიკაციაც, რომ რაც ხდება შეჩერდეს, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა სოფელ ატოცში განაცხადა, სადაც საოკუპაციო რეჟიმის მხრიდან მავთულხლართების მონტაჟი მიმდინარეობს.

„პირველ რიგში, გეტყვით, რომ რაც აქედან 50 მეტრში ხდება ეს არის სამარცხვინო, აბსოლუტურად მიუღებელი და პოლიტიკას, რომელსაც რუსეთი 2008 წლიდან მოყოლებული ჩვენი ქვეყნის ტერიტორიაზე ახორციელებს, არ ექნება არანაირი პერსპექტივა. ამაში ვარ სრულიად დარწმუნებული. მინდა ამ ადგილიდან ხმამაღლა ვთქვა, რომ ჩვენ ამას არ შევეგუებით, ჩვენ არ გავტყდებით, კიდევ უფრო გავძლიერებით, არ შევწყვეტთ მშვიდობიან ბრძოლას, ვიდრე ამ სამარცხვინო მავთულხლართების ბოლო მეტრი არ დაიშლება ჩვენი ქვეყნის ტერიტორიაზე. მე დღეს აქ ყოფნით მინდა ატოცის მოსახლეობის მიმართ მხარდაჭერა გამოვხატო. დღეს ფიზიკურად ვარ მათთან და ასე გამოვხატავ მხარდაჭერას, ჩემი ყოველდღიური საქმიანობა ემსახურება ამ ხალხის ინტერესებს. ასევე, იმ ხალხის ინტერესებს, ვინც დაზარალებულია ამ მავთულხლართების პოლიტიკით დღეს“, - განაცხადა ციხელაშვილმა.

მისივე თქმით, რუსეთის მხარე ცდილობს, რომ შემოსაზღვროს „სამხედრო გეტო“.

„ფაქტობრივად, დაცარიელებული ცხინვალის რეგიონის იზოლაციას აკეთებენ და იქ დარჩენილებისთვის გაუსაძლის პირობებს ქმნიან. რუსი სამხედროების მიერ ამ არარსებული საზღვრის გადაკვეთისას დაკავებული ადამიანების თითქმის 90% არიან სწორედ ისინი, რომლებიც ოკუპირებულ ტერიტორიაზე ცხოვრობენ და გადაადგილება სჭირდებათ. ეს არის ყველასთვის მიუღებელი და გაუსაძლისი მდგომარეობა“, - განაცხადა ციხელაშვილმა.

მისივე თქმით, წინასაარჩევნო გარემოა და როგორც ჩანს, უნდათ ხელისუფლებასა და მოსახლეობაზე დამატებითი ზეწოლის ბერკეტი გამოიყენონ.

„ზუსტად ამიტომ, ჩვენ უნდა ვიყოთ განსაკუთრებით მტკიცე და ძლიერი, არ მივცეთ ამ პროვოკაციებს იმის ნება, რომ თავის მიზანს მიაღწიოს. ჩვენ აუცილებლად სტაბილურად უნდა განვვითარდეთ“, - განაცხადა ციხელაშვილმა.

მისივე თქმით, ორი დღის წინ იყო სპეციალური კომისიის სხდომა და არაერთი გადაწყვეტილება მიიღეს იმისთვის, რომ ატოცსა და სხვა სოფლებს გამოზამთრებაში დაეხმარონ.

„არაერთი მნიშვნელოვანი გადაწყვეტილება იქნა მიღებული, რომ ატოცსა და სხვა სოფლებს გამოზამთრებაში დავეხმაროთ. კერძოდ, დავეხმაროთ 200-ლარიანი ვაუჩერებით, ყველა სტუდენტი დავაფინანსოთ, მათი რიცხვი 4 წლის განმავლობაში 471-დან 1200-მდე გაიზარდა. კიდევ მეტი ვიქნებით და არ დატოვებს ეს მოსახლეობა ამ სოფლებს“, - განაცხადა ციხელაშვილმა.

იხილეთ ვიდეო: ქეთევან ციხელაშვილი - არ შევეგუებით, არ გავტყდებით, ვიდრე სამარცხვინო მავთულხლართების ბოლო მეტრი არ დაიშლება ჩვენი ქვეყნის ტერიტორიაზე

რამაზ საყვარელიძე - ჩვენი საზოგადოების პრობლემა ისაა, რომ მან ახალი ამბიციური და ბრძოლისუნარიანი პოლიტიკური ძალა, ჯერჯერობით, ვერ წარმოშვა
ქართული პრესის მიმოხილვა 20.01.2020
ასლან ბჟანია - სოხუმსა და თბილისს შორის დიალოგი უნდა იყოს, როგორ ფორმატში, რა ფორმით, მნიშვნელობა არ აქვს
ხელოვნური ინტელექტი და სასამართლო - კიბერმართლმსაჯულება