ზაზა სარალიძე „ნაცმოძრაობის“ საწინააღმდეგო აქციაზე - პოლიტიკასთან არანაირი შეხება არ მაქვს და აქციასთან დაკავშირებით არანაირი პოზიცია არ გამაჩნია
რუსთაველის გამზირზე, პარლამენტის შენობასთან, სადაც ზაზა სარალიძე, მალხაზ მაჩალიკაშვილი და მათი მხარდამჭერები რამდენიმე თვეა საპროტესტო აქციებს მართავენ, პერიმეტრზე პოლიციაა მობილიზირებული.
აღნიშნული გამოწვეულია იქიდან, რომ პარალელურად რუსთაველის გამზირზე იმართება „ერთიანი ნაციონალური მოძრაობის“ საწინააღმდეგო აქცია სლოგანით - „არა ნაციზმს, გავიხსენოთ 7 ნოემბერი“. ზაზა სარალიძის თქმით, მას აღნიშნულ აქციასთან დაკავშირებით არანაირი პოზიცია არ გააჩნია.
„ეს არის პოლიტიკური აქცია, როგორც ხედავთ. მე პოლიტიკასთან არანაირი შეხება არ მაქვს. მე ვითხოვ ჩვენი შვილების მკვლელების დასჯას და სამართლიანობის აღდგენას, აქედან გამომდინარე, აქციასთან დაკავშირებით არანაირი პოზიცია არ გამაჩნია“, -განაცხადა ზაზა სარალიძემ.
