ყველა ბერკეტს ვიყენებთ და გამოვიყენებთ მომავალშიც იმისთვის, რომ პროცესი შეჩერდეს და დაიშალოს ეს მავთულხლართები საქართველოს შუაგულში, - ასე გამოეხმაურა შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი სოფელ ატოცში მიმდინარე მოვლენებს.

სახელმწიფო მინისტრის თქმით, ის პირადად იმყოფებოდა და ადგილზე გაეცნო ვითარებას.

„დღეს პრემიერ-მინისტრმა ხაზი გაუსვა იმ პოზიციას, რომელიც აქვს სახელმწიფოს, რომ ჩვენ არ ვაპირებთ შევეგუოთ არც ძველ და არც ახალ მავთულხლართებს და ბუნებრივია, ყველა ბერკეტი ამოქმედებულია. აღნიშნულ ბერკეტებს მომავალშიც გამოვიყენებთ იმისთვის, რომ ეს პროცესი შეჩერდეს და დაიშალოს მავთულხლართები საქართველოს შუაგულში. მავთულხლართების ამ პოლიტიკას არანაირი პერსპექტივა არ გააჩნია. დღეს, ჩვენი პარტნიოტების მხრიდანაც გაკეთდა ძალიან ცალსახა შეფასებები. საქართველოში სტუმრად მყოფი ბრიტანეთის ევროპულ საკითხებში მინისტრი ალან დუნკანი ეხმაურება მომხდარს და კიდევ ერთხელ ამბობს, რომ უნდა დაიშალოს ეს მავთულხლართები. მიუღებელია მთლიანად ცივილური მსოფლიოსათვის ის ხელოვნური ბარიკადები, რომელსაც რუსეთი 2008 წლიდან მოყოლებული აშენებს და ეს პოზიცია არის ერთსულოვანი. ჩვენ კონკრეტული ნაბიჯებით და ქმედებებით ვუპირისპირდებით ამ პოლიტიკას. ჩვენი პასუხია, მეტი განვითარება, მეტი პროგრესი", - განაცხადა ციხელაშვილმა.