„ევროპის სახალხო პარტიამ“ მანფრედ ვებერი ევროკომისიის პრეზიდენტობის კანდიდატად დაასახელა.

გერმანული „ქრისტიანულ-დემოკრატიული კავშირის“ ვიცე-პრეზიდენტმა მანფრედ ვებერმა „ევროპის სახალხო პარტიის“ 492 დელეგატის მხარდაჭერა მიიღო, ხოლო მისმა კონკურენტმა ფინეთის ყოფილმა პრემიერმა ალექსანდრე შტუბმა კი - 127 ხმა.

„მე ვოცნებობ ევროპაზე, რომელიც არავისზე არ იქნება დამოკიდებული, ევროპაზე, რომელშიც ჩვენ ვშრომობთ და ყველა ევროპელისთვის საუკეთესო პირობებს ვქმნით“, - განაცხადა მანფრედ ვებერმა.

მისივე თქმით, ევროკომისიის პრეზიდენტად არჩევის შემთხვევაში, მისი პრიორიტეტი იქნება ევროპული საზღვრებისა და ღირებულებების დაცვა.

ევროკომისიის მოქმედმა პრეზიდენტმა ჟან-კლოდ იუნკერმა განაცხადა, რომ ევროპარლამენტის 2019 წლის არჩევნების შემდეგ პოსტს დატოვებს.