კახა კალაძე - „ნაციონალური მოძრაობის“ პოლიტიკის შედეგია, რომ საქართველოს ტერიტორიების 20% ოკუპირებულია

„ქართული ოცნების“ გენერალური მდივნის განცხადებით, „ნაციონალური მოძრაობის“ პოლიტიკის შედეგია, რომ საქართველოს ტერიტორიების 20% ოკუპირებულია. ამის შესახებ კახა კალაძემ ჟურნალისტებს სოციალურ ქსელში გავრცელებულ ვიდეოსთან დაკავშირებით განუცხადა, სადაც ყოფილი პრეზიდენტი მიხეილ სააკაშვილი 2008 წლის აგვისტოს ომის შესახებ საუბრობს.

„მგონი სიახლე არაფერია, ყველამ ხომ ვიცოდით რა იყო, როგორ მოხდა და რა მოხდა. პირდაპირ ამბობს ადამიანი იმას, რაც გააკეთა. ყველაზე დიდი უბედურებაა, რომ მათი პოლიტიკის შედეგია, რომ დღეს, ჩვენ ტერიტორიების 20% გვაქვს დაკარგული, რუსებს ჩააბარეს ტერიტორიები. სამწუხაროდ და საუბედუროდ, დავკარგეთ მშვიდობიანი მოსახლეობა, ჩვენი გმირი ბიჭები. ესაა „ნაციონალური მოძრაობა“ და მიხეილ სააკაშვილის რეალური სახე“, - განაცხადა კალაძემ.

ჟურნალისტის კითხვაზე, თუ ვინ დაიწყო ომი, კახა კალაძემ განაცხადა, რომ არის გარკვეული თემები, რომლის სიღრმეშიც არ უნდა შეხვიდე.

„მე ვარ ჩემი ქვეყნის პატრიოტი. ამიტომ არის რაღაც თემები, სიღრმეში არ უნდა შევიდეთ. რუსეთი არის აგრესორი. დღეს ჩვენი ტერიტორიები ოკუპირებულია“, - განაცხადა კალაძემ.

სოციალურ ქსელში გუშინ გავრცელდა არქივის ვიდეო, რომელშიც საქართველოს ყოფილი პრეზიდენტი მიხეილ სააკაშვილი 2008 წლის აგვისტოს ომის შესახებ საუბრობს და აცხადებს, რომ არასდროს დაუმალავს, რომ ცხინვალში სამხედრო მოქმედებების წარმოების გადაწყვეტილება მისმა ხელისუფლებამ მიიღო.

მოგვიანებით, მიხეილ სააკაშვილმა სოციალურ ქსელში გაავრცელა ვიდეო მინაწერით: "აი ვიდეოც, რომელიც ივანიშვილის პროპაგანდამ მოჭრა და თავისი ღალატის გადასაფარად გაავრცელა". ვიდეოჩანაწერი ასახავს მიხეილ სააკაშვილის მიერ აგვისტოს ომის შემსწავლელი დროებითი საპარლამენტო კომისიისთვის მიცემულ ჩვენებას.

კორნელი კაკაჩია - აშშ-ში საქართველოს ხელისუფლების წარმომადგენელთა ვიზიტი საკმაოდ დაგვიანებულია, ამიტომ, არა მგონია, რომ ამ ვიზიტმა რამე შეცვალოს
ქართული პრესის მიმოხილვა 28.01.2020
თენგიზ ფხალაძე - პოლიტიკურ ძალებს შორის ურთიერთობაში უნდა არსებობდეს ზღვარი, რომლის იქითაც პროცესი არ უნდა წავიდეს, თუკი ეს ზღვარი წაიშალა, მძიმე შედეგს მივიღებთ
„ინვესტ ჯგუფი“ ანანოვების სასახლის მასშტაბური რეაბილიტაციის პროექტს იწყებს
"თიბისიმ" მსოფლიოში საუკეთესოდ აღიარებული მობაილბანკი განაახლა