გაერთიანებული ოპოზიციის წევრები ბათუმის ხელოვნების ცენტრში ამომრჩევლებს ხვდებიან. ლიდერებმა შეკრებილებს პირველ ტურში მხარდაჭერისთვის მადლობა გადაუხადეს, ამომრჩეველს კიდევ ერთხელ გააცნეს საარჩევნო პროგრამა და მეორე ტურში მხარდაჭერა სთხოვეს.
ხელოვნების ცენტრში საქართველოს ყოფილი პირველი ლედი სანდრა რულოვსი, პრეზიდენტობის კანდიდატი გრიგოლ ვაშაძე და სხვა ლიდერები იმყოფებიან. ამომრჩეველთან გაერთიანებული ოპოზიციის შეხვედრას არმაზ ახვლედიანიც ესწრება, რომელმაც მეორე ტურში გრიგოლ ვაშაძეს მხარდაჭერა გამოუცხადა.
"ეს ხალხი იმის გარანტია, რომ სიძულვილის ენას დავამარცხებთ და გავაერთიანებთ საზოგადოებას, რომლებიც სამშობლოსთვის იმუშავებენ. ხელისუფლებაში ჩაბუდებულმა კრიმინალებმა მოძალადე ხელისუფლება შექმნეს. ოლიგარქის შვილის ქორწილში მთელი მცხეთა ევაკუირებულია. სვეტიცხოველი ეკუთვნის ყველას",- განაცხადა გრიგოლ ვაშაძემ სიტყვით გამოსვლისას.
გრიგოლ ვაშაძემ მასწავლებელთა და პოლიციელთა ხელფასების ზრდაზე ისაუბრა. მან ასევე აღნიშნა, რომ ახალგაზრდები თურქეთში სამუშაოდ არ უნდა მიდიოდნენ.