აჭარის უმაღლესი საბჭოს ბიუროს 26-ე სხდომა გაიმართა
აჭარის ავტონომიური რესპუბლიკის უმაღლესი საბჭოს ბიუროს რიგით 26-ე სხდომაზე, რომელსაც საკანონმდებლო ორგანოს თავმჯდომარე დავით გაბაიძე უძღვებოდა, გიგა ჩხარტიშვილის საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს წევრად - მრჩევლად არჩევის შესახებ იმსჯელეს. ამის შესახებ ინფორმაციას აჭარის უმაღლესი საბჭოს პრესსამსახური ავრცელებს.
დავით გაბაიძის განცხადებით, საკონკურსო კომისიის მიერ წარმოდგენილი 6 კანდიდატიდან უმაღლესი საბჭოს ფრაქცია „ქართული ოცნების“ წევრებმა მხოლოდ ერთი - გიგა ჩხარტიშვილი შეარჩიეს.
ბიუროს გადაწყვეტილებით, ფარული კენჭისყრა უმაღლესი საბჭოს რიგგარეშე სხდომაზე გაიმართება. წინააღმდეგი ფრაქცია „ერთიანი ნაციონალური მოძრაობის“ თავმჯდომარე ელგუჯა ბაგრატიონი აღმოჩნდა.
