საქართველოში პოლიტიკოსები უნდა დაუბრუნდენ რეალობას, იმედია, ბრძოლა იქნება იდეებისა და მოსახლეობის კეთილდღეობისთვის და არ იქნება ერთმანეთს შორის შუღლი, - ამის შესახებ საქართველოში საფრანგეთის ელჩმა პასკალ მენიემ საარჩევნო გარემოს შესახებ “ინტერპრესნიუსის” შეკითხვის პასუხად განაცხადა.

საფრანგეთის ელჩმა გაიხსენა საპრეზიდენტო არჩევნების შემდეგ თბილისის მერის, კახა კალაძის მიერ გაკეთებული განცხადება, სადაც თბილისის მერი ამბობდა, რომ მოსახლეობის ნაწილი კმაყოფილი არ არის. “თბილისის მერმა კახა კალაძემ პირველი რაუნდის შემდეგ განაცხადა, რომ შესაძლოა, მოსახლეობის ნაწილი ძალიან კმაყოფილი არ არის. საარჩევნო კამპანიის ატმოსფეროს შესახებ უნდა ვთქვა, რომ ცოტა ხნის წინ სალომე ზურაბიშვილისა და მისი შვილების მიმართ იყო გარკვეული საფრთხეები და ვფიქრობ, რომ ეს ყველაფერი უფრო შორს მიდის. მიმაჩნია, რომ საქართველოს მოსახლეობა, რომელსაც სჯერა დემოკრატიის, ამაზე მეტს იმსახურებს. იმედი მაქვს, მოვა დღე, როცა პოლიტიკოსები დაუბრუნდებიან რეალობას და ბრძოლა იქნება იდეებისთვის, მოსახლეობის კეთიდღეობისთვის და არ იქნება ერთმანეთს შორის შუღლი”, - აღნიშნა მან.