დიდი ბრიტანეთის მინისტრთა კაბინეტმა „ბრექსიტის“ შესახებ პროექტი დაამტკიცა

დიდი ბრიტანეთის მინისტრთა კაბინეტმა ევროკავშირიდან დიდი ბრიტანეთის გასვლის შესახებ შეთანხმების პროექტი დაამტკიცა.

ამის შესახებ დიდი ბრიტანეთის პრემიერ-მინისტრმა ტერეზა მეიმ განაცხადა.

„მინისტრთა კაბინეტის კოლექტიური გადაწყვეტილება ის არის, რომ მთავრობა უნდა დაეთანხმოს ევროკავშირიდან გასვლის შესახებ შეთანხმების პროექტის პირობებს და შესაბამის პოლიტიკურ დეკლარაციას“, - განაცხადა დიდი ბრიტანეთის პრემიერ-მინისტრმა.

მისივე თქმით, შეთანხმების აღნიშნული პროექტი საუკეთესოა.

„ეს გადამწყვეტი ნაბიჯია, რაც საშუალებას გვაძლევს წინ წავიწიოთ და უახლოეს დღეებში შეთანხმება გავაფორმოთ“, - განაცხადა მან.

ტერეზა მეიმ აღნიშნა, რომ მიღებული გადაწყვეტილება ეროვნულ ინტერესებს შეესაბამება.

თავის მხრივ, ევროკომისია ევროკავშირის წევრ ქვეყნებს რეკომენდაციით მიმართავს, დაამტკიცონ ბრიტანეთის ევროკავშირიდან გასვლის თაობაზე შეთანხმების პროექტი.