მიხეილ ბატიაშვილი ბათუმის შოთა რუსთაველის სახელმწიფო უნივერსიტეტის პროფესორებსა და სტუდენტებს შეხვდა

საქართველოს განათლების, მეცნიერების, კულტურისა და სპორტის მინისტრი, მიხეილ ბატიაშვილი ბათუმის შოთა რუსთაველის სახელმწიფო უნივერსიტეტის პროფესორებსა და სტუდენტებს შეხვდა და მათ უმაღლესი განათლების მიმართულებით დაგეგმილი ახალი ინიციატივები გააცნო.

სამინისტროს ინფორმაციით, შეხვედრის ნაწილი აუდიტორიის შეკითხვებს დაეთმო, რომელსაც მინისტრმა ამომწურავი პასუხები გასცა.

„ბათუმის უნივერსიტეტში ბოლო პერიოდში არაერთი მნიშვნელოვანი ინფრასტრუქტურული პროექტი განხორციელდა. განახლებული პროგრამებით, უნივერსიტეტის შვიდ ფაკულტეტზე (განათლების, ჰუმანიტარულ, სოციალურ მეცნიერებათა, საბუნებისმეტყველო და ჯანდაცვის, ბიზნესისა და სამართალმცოდნეობის, ტურიზმის, ფიზიკა-მათემატიკისა და კომპიუტერულ მეცნიერებათა და ტექნოლოგიურ ფაკულტეტებზე), 6000-ზე მეტი სტუდენტი სწავლობს“, - აცხადებენ სამინისტროში.