ამ ეტაპზე არ გვაქვს განცდა, რომ წყარომ შეცდომაში შეგვიყვანა, - ამის შესახებ ჟურნალისტებს მთავარი პროკურატურის შენობის დატოვების შემდეგ "სამართლიანი არჩევნების" წარმომადგენელმა მიხეილ ბენიძემ განუცხადა.

მისი თქმით, დაახლოებით 3 ათასი ადამიანის ცვლილება საარჩევნო სიაში ქვეყნის მასშტაბით შესაძლოა არ იყოს პრობლემური, თუმცა მნიშვნელოვანია სიის დეტალური შესწავლა. "ვაპირებთ ამომრჩეველთა სიის გადამოწმებას და შედარებას უბნების მიხედვით, თუ არის მნიშვნელოვანი ცვლილება, უბრალოდ ამას გარკვეული დრო სჭირდება. დაახლოებით 3000 ადამიანის ცვლილება ქვეყნის მასშტაბით შესაძლოა არ იყოს პრობლემური, უბრალოდ უნდა ვნახოთ უბნების მიხედვით რა მდგომარეობაა", - აღნიშნა მიხეილ ბენიძემ.

სახელმწიფო სერვისების განვითარების სააგენტოს უფროსის, სოსო გიორგაძის ინფორმაციით, პირველი ტურის შემდეგ ამომრჩეველთა სიაში მცირედი ცვლილება განხორციელდა, რომელთა რაოდენობა დაახლოებით 3 ათასია. მისი განმარტებით, ეს ცვლილება მოქალაქეთა გარდაცვალებას და სრულწლოვნობის ასაკის მიღწევას უკავშირდება.