საქართველოს ახლად არჩეულ პრეზიდენტს სალომე ზურაბიშვილს, როგორც ალისას, „საოცრებათა ქვეყანაში“ ცხოვრება მოუწევს - ერთი მხრივ, ოკუპანტების დაგმობა და მეორე მხრივ, მათთვის საქონლისა და მომსახურების მიყიდვა, - ამის შესახებ ოკუპირებული სამხრეთ ოსეთის დე ფაქტო საგარეო საქმეთა მინისტრმა დიმიტრი მედოევმა განაცხადა.

დიმიტრი მედოევმა ასევე გააკეთა კომენტარი სალომე ზურაბიშვილის გუშინდელ ინტერვიუზე, სადაც მან აღნიშნა, რომ ახლა რუსეთთან თანამშრომლობის დრო არ არის.

„არა მგონია, რომ ვინმე მისგან უფრო ორიგინალურ პასუხს ელოდებოდა ამ საკითხზე. არჩევის პირველი წუთებიდან ხმამაღალი მესიჯი იქნა გაგზავნილი, როგორც დასავლელი პარტნიორებისთვის, ასე რუსეთისთვის. ეს მესიჯი შიდა მოხმარებისთვისაც გამოსადეგია“, - განაცხადა მედოევმა.

მისივე თქმით, გაუგებარია თუ როგორ შეიძლება რუსებს ოკუპანტები უწოდო და ამავდროულად მათ რესტორნებში ემსახურო და უცეკვო.

„საქართველოს ახლად არჩეულ პრეზიდენტს სალომე ზურაბიშვილს, როგორც „ალისას საოცრებათა ქვეყანაში“ ცხოვრება მოუწევს - ერთი მხრივ, ოკუპანტების დაგმობა და მეორე მხრივ, მათთვის საქონლისა და მომსახურების მიყიდვა. ეს 40-იანი წლების პარიზს ჰგავს, სადაც კოლაბორაციონიზმს ჰქონდა ადგილი. თუმცა ეს თემა ახლოა სალომე ზურაბიშვილისთვის“, - დასძინა მან.