„სამოქალაქო მოძრაობის“ გუნდის წევრებმა ახალი მოძრაობის მიზნებსა და მისიებზე დეტალურად ისაუბრეს.

როგორც ალეკო ელისაშვილის გუნდში აცხადებენ, სამოქალაქო მოძრაობის ძირითადი მიზანია საქართველოში ადამიანური გარემოს შემქნა საზოგადოებიდან ახალი ლიდერების გაჩენის მეშვეობით, ასევე ინოვაციების დანერგვის და მოქალაქეთა ჩართულობის გზით, ადამიანებისთვის პერსპექტივის გაჩენა.

მათივე ინფორმაციით, ალექსანდრე ელისაშვილის გარშემო ახალ, რეფორმატორულ მოძრაობაში გაერთიანების შესაძლებლობა აქვს ყველა პროფესიონალ და კეთილსინდისიერ ადამიანს, ვისაც შესწევს ძალა, დემოკრატიულ ღირებულებებზე დაყრდნობით შეცვალოს არსებული რეალობა.

„ფართო საზოგადოებრივი ჩართულობისა და მხარდაჭერის მქონე გაერთიანება ახალი ლიდერებით, მნიშვნელოვან გავლენას მოახდენს პოლიტიკურ პროცესებზე. ახალი მოძრაობის პრიორიტეტულ საკითხთა შორის არის, განათლება, ჯანდაცვა და ურბანული მიმართულებები. სამოქალაქო მოძრაობა ევროპის დემოკრატიული მხარდაჭერის ფონდის მიერ ფინანსდება“, - აღნიშნულია „სამოქალაქო მოძრაობის“ მიერ გავრცელებულ ინფორმაციაში.

პარლამენტის ეროვნულ ბიბლიოთეკაში „სამოქალაქო მოძრაობის“ პრეზენტაცია გაიმართა. მოძრაობის წევრებმა - ალეკო ელისაშვილმა, ლევან იოსელიანმა, ვატო სურგულაძემ მხარდამჭერებსა და თანამოაზრეებს „სამოქალაქო მოძრაობის“ ხედვა და სამომავლო გეგმები გააცნეს.