ფაქტობრივად, დედაქალაქის ბიუჯეტის ზრდა მხოლოდ და მხოლოდ ბიუროკრატიას შეეხო და სხვას არავის, - ამის შესახებ საკრებულოს ფრაქცია "ნაციონალური მოძრაობის" წევრმა ირაკლი ნადირაძემ დედაქალაქის ბიუჯეტის გადამუშავებულ ვერსიაზე საუბრისას განაცხადა, რომელიც მერიამ საკრებულოში 10 დეკემბერს შეიტანა.
ნადირაძის თქმით, ქვეყანაში კატასტროფულად არის გაძვირებული ყველაფერი და გუშინ ჩვენს გაჭირვებულ მოსახლეობას პური გაუძვირეს.
„იმის ნაცვლად, რომ მერიას „ქამრები შემოეჭირა“ და შეემცირებინა ბიუროკრატია, მათ კიდევ 7 მლნ ლარით გაზარდეს სახელფასო ფონდი ფულადი ჯილდოებისთვის. ასევე თავიანთი მივლინებების, რესტორნების, მანქანების მომსახურების ხარჯები, მათ ასევე გაზარდეს სარეკლამო ხარჯები იმ ფონზე, როდესაც მაგალითად შეამცირეს ავარიული კორპუსების დაფინანსება. ეს ბიუჯეტი ისევ და ისევ მორგებულია მაღალჩინოსნების ფუფუნებაზე, მათ კარგად ყოფნაზე, მათ კეთილდღეობაზე და არაფერი საერთო არ აქვს ამას თბილისელების კეთილდღეობასთან და პრობლემების მოგვარებასთან. ბიუჯეტის ზრდა 10 მილიონი რაც არის, ამ 10 მილიონიდან ფაქტობრივად, 7 მილიონი ეხება ბიუროკრატიას, მათ ფულად ჯილდოებს, სარესტორნო და მანქანების ხარჯებს, დანარჩენი ზრდა არის რეკლამების ხარჯის ზრდა", - განაცხადა ნადირაძემ.
თბილისის მერიამ 10 დეკემბერს, საკრებულოში დედაქალაქის 2019 წლის ბიუჯეტის გადამუშავებული ვარიანტი შეიტანა. ბიუჯეტი პირველ ვარიანტთან შედარებით 56 000 000 ლარითაა გაზრდილი და ჯამში 927 631 500 ლარს შეადგენს.