დავით რაქვიაშვილი მადლობას უხდის ყველას, ვინც 22 წლის განმავლობაში ეროვნული უშიშროების საბჭოს ემსახურებოდა

ეროვნული უშიშროების საბჭოს მდივანი დავით რაქვიაშვილი მადლობას უხდის ყველა იმ პირს, ვინც 22 წლის განმავლობაში ეროვნული უშიშროების საბჭოს ემსახურებოდა.

რაქვიაშვილი “ფეისბუქის“ გვერდზე წერს, რომ 16 დეკემბერს არსებობას დამოუკიდებელი საქართველოს პირველი კონსტიტუციით შექმნილი ეროვნული უშიშროების საბჭო შეწყვეტს, რომელიც სახელმწიფოებრიობის ერთ-ერთი უმნიშვნელოვანესი ატრიბუტი იყო.

„16 დეკემბერს არსებობას შეწყვეტს 1995 წელს დამოუკიდებელი საქართველოს პირველი კონსტიტუციით შექმნილი ეროვნული უშიშროების საბჭო. უწყება, რომელიც იყო ჩვენი სახელმწიფოებრიობის ერთერთი უმნიშვნელოვანესი ატრიბუტი; ჩვენი ქვეყნის განვითარების ყველაზე რთულ პერიოდებში, ყველა ეტაპზე და ყველა ხელისუფლების პირობებში ერთგულად ემსახურა სამშობლოს; ფორმალური დანიშნულებითაც და არსებითადაც იყო სახელმწიფოს მესვეურთა აზრთა გაცვლის, შეჯერების და უმნიშვნელოვანესი პოლიტიკური გადაწყვეტილებების შემუშავების ადგილი; ქმნიდა ეროვნული უსაფრთხოების სფეროს სტრატეგიულ ინტელექტუალურ რესურსებს; აყალიბებდა ერთიან ეროვნულ მიდგომას უსაფრთხოების საკითხებისადმი;

მადლობას ვუხდი ყველას, ვინც 22 წლის განმავლობაში ემსახურა ამ ინსტიტუტს, ჩვენს ქვეყანას და იყო ამ უმნიშვნელოვანესი პროცესის - დამოუკიდებელი საქართველოს ეროვნული უსაფრთხოების სისტემის მშენებლობის თანამონაწილე.

ეს ყოველივე მხოლოდ ისტორიის კუთვნილება არაა. ეს ყოველივე ჩვენი სახელმწიფოებრიობის აქტივია რომლის გაფლანგვა დანაშაული იქნება”, - წერს ჯერ კიდევ მოქმედი უშიშროების საბჭოს მდივანი “ფეისბუქის“ გვერდზე.

ახალი კონსტიტუციით, რომელიც ძალაში პრეზიდენტის მიერ ფიცის დადებისთანავე შევა, ეროვნული უშიშროების საბჭო გაუქმებას დაექვემდებარება. ეროვნული უშიშროების საბჭო ეროვნული თავდაცვის საბჭოთი იცვლება, რომელიც პრეზიდენტის თავმჯდომარეობით მხოლოდ საომარი მდგომარეობის დროს შეიძლება შეიქმნას.

ეკატერინე დგებუაძე - შემიძლია დაგიდასტუროთ, რომ არცერთი მოსწავლე არ დარჩება სასწავლო განათლების მიღმა
ქართული პრესის მიმოხილვა 06.04.2020
ვაჟა ბერიძე - მთავრობა სწრაფად და ეფექტიანად რეაგირებს გამოწვევებზე, ეს სადღეისოდ საკმარისია, მაგრამ ტაში და ვაშა ჯერჯერობით ნაადრევია
"ლიბერთის" 500 000-ლარიანი მხარდაჭერა ბავშვთა მცირე საოჯახო სახლებს
კომპანია "ნოვა" პანდემიის გამოწვევის დასაძლევად 65 000 ლარს გამოყოფს