საქართველოს თავდაცვის მინისტრის, ლევან იზორიას განცხადებით, სამხედრო ნაწილში არჩევნებზე დაფიქსირებული შედეგი თანამდებობაზე ყოფნა-არ ყოფნის საკითხს არ წყვეტს. ასე უპასუხა იზორიამ კითხვას, რომ ვრცელდება ინფორმაცია, ავღანეთში, ქართულ სამხედრო ნაწილში დაფიქსირებული შედეგი არჩევნებზე შესაძლოა, მისი გათავისუფლების მიზეზი გახდეს. როგორც იზორიამ აღნიშნა, ეს საფუძველი დემოკრატიულ ქვეყანაში არ არსებობს.

„იმ ფაქტით, რა ფაქტითაც ჩემი გადადგომის საფუძველს ხედავთ, ეს საფუძველი არავისთვის არსებობს, პირველ რიგში იმ სახელმწიფოს ფარგლებში, სადაც განსაკუთრებით ჯარი და პოლიცია უნდა იყოს მაქსიმალურად დეპოლიტიზებული. ასე რომ, ცალკეული ჯარისკაცის თუ პოლიციელის პოლიტიკური შეხედულებებით არ მიიღება თანამდებობის პირების ყოფნა-არ ყოფნაზე გადაწყვეტილება. ეს არის კიდევ ერთხელ დასტური ჩვენი ქვეყნის დემოკრატიის მაღალი ხარისხის",- განაცხადა იზორიამ.