დღეს საბრალდებო სკამზე დავით კირკიტაძე კი არა, გიორგი გახარია უნდა იჯდეს, - ამის შესახებ "ინტერპრესნიუსს" "ერთიანი ნაციონალური მოძრაობის“ ერთ-ერთმა ლიდერმა ზაალ უდუმაშვილმა, გურჯაანის რაიონულ სასამართლოსთან განუცხადა, სადაც კირკიტაძის მეგობრები და პარტიის მხარდამჭერები არიან შეკრებილი.
როგორც უდუმაშვილი აცხადებს, კირკიტაძის გათავისუფლების მოლოდინი არ აქვს, რადგან მისივე განმარტებით, კირკიტაძე ივანიშვილის და გახარიას პირადი პატიმარია.
"ჩვენი სამოქმედო გეგმა იმის მიხედვით განისაზღვრება, თუ რა გადაწყვეტილებას მიიღებს დღეს სასამართლო. პოზიტიური იმედი მაქვს-მეთქი იმ სასამართლოსგან, რომელიც სასამართლო კი არა, ივანიშვილის სანოტარო ბიურო გახლავთ, მოგატყუებთ. ჩვენ გავაკეთებთ მაქსიმუმს იმისთვის, რომ დღეს დავით კირკიტაძე გათავისუფლდეს სასამართლო დარბაზიდან. ის არის გახარიას და ივანიშვილის პირადი პოლიტიკური პატიმარი. იმ კადრებით, რომლითაც ხელისუფლება აპელირებს და ამბობს, რომ იქ თითქოს, სამართალდარღვევა იყო, კარგად შეხედონ იმ კადრებს, საიდან იწყება სამართალდარღვევა. სამართალდარღვევა იწყება იქიდან, როცა გზა ჩაუხერგეს მშვიდობიან მომიტინგეებს, რომლებიც თელავში მიდიოდნენ. დღეს, საბრალდებო სკამზე დავით კირკიტაძე კი არა, გიორგი გახარია უნდა იჯდეს", - აცხადებს უდუმაშვილი.