დიდი ბრიტანეთის მთავრობა არ გეგმავს ქვეყნის ევროკავშირიდან გამოსვლის თარიღის გადავადებას, - ამის შესახებ Brexit-ის საკითხებზე დიდი ბრიტანეთის მინისტრმა სტივენ ბარკლიმ განაცხადა.
„შემიძლია უარვყო გავრცელებული ინფორმაცია. მკაფიოდ შემიძლია განვაცხადო, მთავრობის ხაზი არის ის, რომ ევროკავშირი 29 მარტს უნდა დავტოვოთ. პრემიერ-მინისტრმა არაერთხელ განაცხადა ამის შესახებ პარლამენტში. მნიშვნელოვანია რეფერენდუმის შედეგების პატივისცემა“, - განაცხადა მინისტრმა.
შეგახსენებთ, გაზეთმა The Daily Telegraph ინფორმაცია გაავრცელა, რომ დიდი ბრიტანეთის ხელისუფლება ევროკავშირიდან გასვლის გადავადების შესაძლებლობას სწავლობს.
დიდმა ბრიტანეთმა ევროკავშირს კავშირიდან გასვლის თაობაზე 2017 წლის 29 მარტს შეატყობინა, ხოლო ლისაბონის ხელშეკრულების 50-ე მუხლის თანახმად, ევროკავშირის წევრი ქვეყნის კავშირიდან გასვლა, გასვლის თაობაზე შეტყობინების წარდგენიდან ორი წლის თავზე ხდება.