გუნდში პრაქტიკულად კონსენსუსი არის, რომ კრიტერიუმები უნდა დადგინდეს, აქედან გამომდინარე, ბუნებრივია, შედარებით მარტივად მივაღწევთ შეთანხმებას და შემდეგ გადავალთ პერსონებზე საუბარზე, - განაცხადა ფრაქცია „ქართული ოცნების“ თავმჯდომარემ მამუკა მდინარაძემ მოსამართლეობის სიასთან დაკავშირებით.

მამუკა მდინარაძის განცხადებით, საქართველოს პარლამენტმა გადაწყვიტა, რომ ფორსირებულ რეჟიმში ამ საკითხის განხილვა არ უნდა მოხდეს და კრიტერიუმებზე სამსჯელოდ გადადო პროცესი.

„ ჩვენ გვაქვს გარკვეული ვადა საგაზაფხულო სესიამდე, რომ ამაზე ვიმსჯელოთ. კრიტერიუმებზე მსჯელობა შედეგთან მიმართებაში ნიშნავს იმას, რომ უნდა გაიწეროს ორგანული კანონის დონეზე ის კონკრეტული კრიტერიუმები, რომელშიც უნდა ჩაჯდნენ შემდგომში მოსამართლეობის კანდიდატები და აქედან გამომდინარე, იუსტიციის საბჭომ წარმოადგინოს ისეთი სია, რომელიც იქნება ამ კრიტერიუმებთან მიმართებაში, ამიტომ არის სწორი პროცესი. ამაში ბუნებრივია, ჩართულები უნდა იყვნენ მოსამართლეთა კორპუსიდან იუსტიციის საბჭოს წარმომადგენლები და რა თქმა უნდა, დომინანტი როდესაც კანონზეა საუბარი და კრიტერიუმებზე საქართველოს პარლამენტი. საბოლოო ჯამში, საზოგადოებრივი ინტერესიც იმაში მდგომარეობს, რომ სასამართლოს დამოუკიდებლობას, სასამართლოში არსებულ პროგრესს არ შეექმნას საფრთხე, გაძლიერდეს და გაცილებით მაღალი იყოს და ამას უზრუნველყოფს კრიტერიუმების დადგენა“, - აცხადებს მამუკა მდინარაძე.