„ნაცმოძრაობის“ წევრი გიგა შუშანია - რესტორანში ერთმანეთს ვანის პოლიციის უფროსის მოადგილე და პროკურატურის წარმომადგენლები დაუპირისპირდნენ

ვანში, რესტორან „მასპინძელოში“ შინაგან საქმეთა სამინისტროს და პროკურატურის თანამშრომლებს შორის მომხდარი დაპირისპირების დეტალებზე „ერთიანი ნაციონალური მოძრაობის“ წევრი გიგა შუშანია საუბრობს.

როგორც ის განმარტავს, სამართალდამცველები ერთმანეთს ფიზიკურად გაუსწორდნენ.

„ჩვენი ინფორმაციით, ვანში, რესტორანში, სუფრაზე ერთმანეთს ფიზიკურად დაუპირისპირდნენ ვანის პოლიციის უფროსის მოადგილე და პროკურატურის წარმომადგენლები. იმ დროს, როცა ქვეყანაში კრიმინალი მძვინვარებს, რეგიონში ამ მიმართულებით უმძიმესი მდგომარეობაა და ძალოვანი უწყებები დაკავებული უნდა იყვნენ კრიმინალთან ბრძოლით და ამ ფაქტების გახსნით, ერთმანეთთან ანგარიშსწორებით არიან დაკავებული. ეს ნათლად მიუთითებს, რა უმძიმეს მდგომარეობაშია ჩვენი სამართალდამცავი სისტემა ჩაფლული“, - აცხადებს შუშანია.

შეგახსენებთ, რომ მომხდარ ფაქტთან დაკავშირებით, ძიება სისხლის სამართლის კოდექსის 126-ე, ძალადობის მუხლით მიმდინარეობს. ინციდენტზე მოკვლევა უკვე დაიწყეს შინაგან საქმეთა სამინისტროსა და გენერალური პროკურატურის გენინსპექციებმა. როგორც შსს-ში აცხადებენ, დაპირისპირებაში მონაწილე სამართალდამცველებს სამსახურებრივი უფლებამოსილება შეუჩერდათ.