ეკა ბესელიას პრესკონფერენციაზე არც ერთი ახალი ამბავი არ ყოფილა, თუმცა თავისთავად პროცესი საინტერესოა, - ამის შესახებ ექსპერტმა გია ხუხაშვილმა „ინტერპრესნიუსთან“ საუბრისას განაცხადა.

გია ხუხაშვილი მიჩნევს, რომ საინტერესო თავად „ქართულ ოცნებაში“ მიმდინარე პროცესია, ხოლო ამ პროცესის გამომწვევი, ექსპერტის აზრით, ბიძინა ივანიშვილის ავტორიტეტის რყევაა.

„ეკა ბესელიამ ფაქტობრივად დღეს გაიმეორა ყველაფერი ის, რასაც ლაპარაკობდა ამ დღეების განმავლობაში. მას პრაქტიკულად ახალი არაფერი უთქვამს. ეს ცუდია, რადგან როდესაც ის თამასას ძალიან მაღლა სწევს და არის გარკვეული მოლოდინი და ამ დროს არაფერს არ ამბობს, ეს რბილად რომ ვთქვათ უცნაურია.

ვფიქრობ, რომ ეს პრესკონფერენცია შეცდომა იყო, არც ერთი ახალი ამბავი არ ყოფილა, თუმცა თავისთავად პროცესი საინტერესოა. არ მიმაჩნია ამ პროცესის მედროშედ ეკა ბესელია. თუ მას ის ილუზია აქვს, რომ მოვლენების ეპიცენტრში იქნება, ასე ვერ მოხდება.

გუნდი „ქართულ ოცნებას“ პირობითად შეიძლება ეწოდოს. ძალიან ეკლექტური წარმონაქმნია. რაც ახლა ხდება, ეს სიახლე არაა და ურთიერთზიზღი და შეუთავსებლობა დამახასიათებელი იყო „ქართული ოცნებისთვის“. უბრალოდ ახლა გამოვლინდა სააშკარაოზე არა იმ მიზნით, რომ რაიმე წინააღმდეგობა გაჩნდა, არამედი იმიტომ, რომ ბიძინა ივანიშვილის ავტორიტეტი შეირყა.

ეს თავისთავად კარგი პროცესია, რადგან ვუყურებთ ბაბილონის გოდოლის ნგრევის პროცესს და საერთოდ, რაც მანკიერია უნდა დაინგრეს“, - განაცხადა გია ხუხაშვილმა.