გვახარებს და მივესალმებით ნებისმიერ ნაბიჯს, რომელიც ამყარებს უკრაინის დამოუკიდებლობას, ტერიტორიულ მთლიანობას და სუვერენიტეტს, - ამის შესახებ ჟურნალისტებს საქართველოს საგარეო საქმეთა მინისტრმა დავით ზალკალიანმა უკრაინის ავტოკეფალიის აღიარებასთან დაკავშირებით განაცხადა. ზალკალიანი მიიჩნევს, რომ საქართველოს მთავრობას ამ საკითხთან დაკავშირებით თავშეკავებული პოზიცია არ აქვს და პოზიცია დააფიქსირეს როგორც საქართველოს პრემიერ-მინისტრმა, ასევე თავად, საგარეო საქმეთა მინისტრმაც. მისი თქმით, ამ თემაზე მთავარი საკითხი უნდა გადაწყდეს საქართველოს მართლმადიდებლური ეკლესიის ფარგლებში.

„კანონიკური ეკლესიის შესაბამისი პროცესის გათვალისწინებით, ამ საკითხისადმი დამოკიდებულება საქართველოს მართლმადიდებლურმა ეკლესიამ უნდა გადაწყვიტოს. რაც შეეხება სახელმწიფოს, მოგეხსენებათ, რომ სახელმწიფო არ ერევა ეკლესიის საქმიანობაში. გვახარებს და მივესალმებით ნებისმიერი ნაბიჯს, რომელიც ამყარებს უკრაინის დამოუკიდებლობას, ტერიტორიულ მთლიანობას და სუვერენიტეტს. როგორ წარმოგიდგენიათ, რომ ჩვენ ეს ფაქტი არ გვახარებდეს?! მე არ ვფიქრობ, რომ ეს თავშეკავებაა. ჩვენ ამ პროცესებს ვაკვირდებით. მთავარი საკითხი უნდა გადაწყდეს ეკლესიის ფარგლებში. პრემიერ-მინისტრმაც გააკეთა ამ საკითხთან დაკავშირებით განცხადება და საგარეო საქმეთა მინისტრმაც“, - განაცხადა ზალკალიანმა.