გარემოს ეროვნული სააგენტოს ატმოსფერული ჰაერის, წყლისა და ნიადაგის ლაბორატორია ზედაპირული და მიწისქვეშა წყლის ხარისხს უახლესი მიკრობიოლოგიური ხელსაწყო-დანადგარის საშუალებით განახორციელებს.

როგორც „ინტერპრესნიუსს“ გარემოს ეროვნული სააგენტოდან აცნობეს, ახალი ხელსაწყოს საშუალებით ლაბორატორიას შესაძლებლობა ექნება, როგორც ზედაპირულ, ასევე მიწისქვეშა წყლებში რამდენიმე კომპონენტი განსაზღვროს.

მათივე ცნობით, სპეციალისტები ლაბორატორიულ კვლევებს მაქსიმალურად მაღალი სიზუსტით განახორციელებენ.

„ახალი მიკრობიოლოგიური ხელსაწყოს საშუალებით შესაძლებელია ზედაპირულ და მიწისქვეშა წყლებში ეშერიხია კოლისა და ტოტალური კოლიფორმების განსაზღვრა უახლესი მეთოდით. ლაბორატორიული კვლევები მაღალი სიზუსტითა და უმოკლეს ვადებში განხორციელდება.

ლაბორატორიული ხელსაწყო გარემოს ეროვნულმა სააგენტომ შეიძინა, რომლის ღირებულება 35 600 ლარს შეადგენს“, - ნათქვამია სააგენტოს მიერ გავრცელებულ ინფორმაციაში.