იუსტიციის უმაღლესი საბჭოს არამოსამართლე წევრის ნაზი ჯანეზაშვილის განცხადებით, მნიშვნელოვანია, რომ სამოქალაქო საზოგადოება არის აქტიური იუსტიციის უმაღლეს საბჭოში და ზოგადად, სასამართლო სისტემაში განვითარებულ მოვლენებთან დაკავშირებით. ჯანეზაშვილი იმედოვნებს, რომ იუსტიციის უმაღლესი საბჭო ყურადღებას გაამახვილებს საზოგადოების მოთხოვნაზე, რომ სასამართლო ქვეყანაში უნდა იყოს დამოუკიდებელი.

„იმედი მაქვს საბჭოში შეისმენენ იმას, რომ საზოგადოებას აქვს განსხვავებული ინტერესები, ინტერესი იმაზე, რომ სასამართლო იყოს ნამდვილად დამოუკიდებელი, როგორც გარე, ისე შიდა გავლენებისგან. მაგრამ, ჩვენ ვხედავთ, რომ რადგანაც „კლანი" მართავს სისტემას, ბუნებრივია, აქ უკვე დგას შიდა დამოუკიდებლობის სერიოზული საფრთხე, მოსამართლეების დამოუკიდებლის საფრთხე - შიდა გავლენებიდან გამომდინარე", - განაცხადა ნაზი ჯანეზაშვილმა.

რაც შეეხება არასამთავრობოების მოთხოვნას, იუსტიციის უმაღლესი საბჭოს დღეს არსებული შემადგენლობის გადადგომის მოთხოვნის თაობაზე, ჯანეზაშვილის თქმით, საბჭო ამას, დიდი ალბათობით, არ დააკაყოფილებს.

„ეს არის სამოქალაქო საზოგადოების მოთხოვნა. არ ვიცი, საბჭოს წევრები ამას დააკმაყოფილებენ თუ არა, მაგრამ არ მგონია, რადგან ჩვენ საქმე გვაქვს ისეთ ადამიანებთან, რომლებიც ძალიან თავისუფლად, სინდისის ქენჯნის გარეშე იღებენ გადაწყვეტილებას, რომ ჩინჩალაძე დააყენონ კანდიდატურად უზენაეს სასამართლოში ასარჩევად. იღებენ გადაწყვეტილებას, რომ მურუსიძე დაინიშნოს თანამდებობაზე უვადოდ. ამიტომ, ასეთი ადამიანებისგან მე ღირსეულ ნაბიჯს არ ველოდები და ასეთი ადამიანებისგან არ ველოდები რომ შეაწუხებთ სინდისი. ეს არის მორალური პასუხისმგებლობის კატეგორიის საკითხი და მორალური პასუხისმგებლობა ამ ადამიანებს არ გააჩნიათ“, - განაცხადა ჯანეზაშვილმა.