აშშ-ს სახელმწიფო დეპარტამენტი ვენესუელაში აშშ-ს საელჩოს რიგ თანამშრომლებს უკან გამოიწვევს, თუმცა საელჩო განაგრძობს ფუნქციონირებას. ამის შესახებ ამერიკული მედია იუწყება.
გარდა ამისა, ვენესუელაში მდებარე აშშ-ს საკონსულოების თანამშრომლები ასევე დაბრუნდებიან სამშობლოში. ამავდროულად, ვენესუელაში აშშ-ს ელჩი და მისი თანაშემწეები ქვეყანაში რჩებიან და განაგრძობენ მუშაობას.
აღნიშნული გადაწყვეტილება იმას უკავშირდება, რომ შექმნილი ვითარებიდან გამომდინარე აშშ-სთვის რთული იქნება დიპლომატიური წარმომადგენლობის 150 თანამშრომლის უსაფრთხოების უზრუნველყოფა.
შეგახსენებთ, რომ გუშინ ვენესუელას ე.წ. პრეზიდენტმა ნიკოლას მადურომ დიპლომატიური ურთიერთობები გაწყვიტა აშშ-სთან და ამერიკელ დიპლომატებს ქვეყნის დატოვებისთვის 72 საათი მისცა.
აშშ ვენესუელას ე.წ. პრეზიდენტის ნიკოლას მადუროს მიერ აშშ-სთან დიპლომატიური ურთიერთობების გაწყვეტის შესახებ გადაწყვეტილებას არ ცნობს.
აშშ-ს სახელმწიფო მდივანმა მაიკ პომპეომ ხაზგასმით აღნიშნა, რომ აშშ არ აღიარებს მადუროს რეჟიმს და „ვენესუელას ყოფილ პრეზიდენტს აშშ-სთან დიპლომატიური ურთიერთობების გაწყვეტის უფლებამოსილება არ გააჩნია“.
„ყველა მხარეს მოვუწოდებთ, თავი შეიკავონ ისეთი ზომებისგან, რაც ეწინააღმდეგება იმ პრივილეგიებსა და იმუნიტეტს, რომლითაც დიპლომატიური საზოგადოება სარგებლობს. აშშ შესაბამის ზომებს მიიღებს და პასუხს აგებინებს ნებისმიერს, ვინც საფრთხის ქვეშ დააყენებს ჩვენი დიპლომატიური მისიის და მისი პერსონალის უსაფრთხოებას“, - დასძინა მან.