ქალაქ დუშეთში, სახალხო პოეტისა და საზოგადო მოღვაწის მიხა ხელაშვილის ხსოვნისადმი მიძღვნილი ღონისძიება გაიმართა.

პრემიერ-მინისტრის მრჩეველი რეგიონულ საკითხებში სოზარ სუბარი, მცხეთა-მთიანეთის სახელმწიფო რწმუნებული შალვა კერესელიძე, ადგილობრივი ხელისუფლების წარმომადგენლები და სახალხო პოეტის შემოქმედების თაყვანისმცემლები მის მშობლიურ ჩარგალს ესტუმრნენ. მათ მიხა ხელაშვილის ცხოვრების მნიშვნელოვანი ეპიზოდები გაიხსენეს. გაიმართა ქართული საბრძოლო ხელოვნების ჩვენება.

„მინდა ქვეყანას მრავლად ჰყავდეს ასეთი შვილები, რომლებიც ფიქრობენ ქვეყნის ბედზე და საკუთარი წვლილი შეაქვთ უკეთესი მომავლის შექმნაში,“ - განაცხადა მხარის რწმუნებულმა შალვა კერესელიძემ პოეტის ხსოვნის პატივსაცემად გამართულ ღონისძიებაზე.

ხანმოკლე ცხოვრების მიუხედავად, მიხა ხელაშვილმა ხალხურ შემოქმედებაში მნიშვნელოვანი კვალი დატოვა. იგი წითელარმიელებს აქტიურ წინააღმდეგობას უწევდა და ქვეყნის ერთიანობისთვის ბრძოლაში ქაქუცა ჩოლოყაშვილის გვერდით იბრძოდა.