ვაზისუბანში მდებარე „საოჯახო მედიცინის ცენტრის“ თანამშრომლები დღეს აქციას გამართავენ. ამის შესახებ „ინტერპრესნიუსს“ პროფკავშირებიდან აცნობეს.
მათივე ინფორმაციით, კლინიკის თანამშრომლები შენობაში ჯანდაცვის სამინისტროს წარმომადგენლებსაც შეხვდებიან. აქციის პარალელურად, მედიცინის მუშაკთა პროფკავშირი დამსაქმებელთან და დასაქმებულებთან მოლაპარაკებებს გამართავს.
„დასაქმებულები არასათანადო შრომითი პირობების გამო ჩივიან და აცხადებენ, რომ ვერ იღებენ დროულად კუთვნილ ხელფასებს, ადმინისტრაცია არ უზრუნველყოფს აუცილებელი ხელსაწყოებითა და რეაქტივებით, ბოლო დღეებში კი აღარც ელექტროენერგია და გაზი აქვთ, რის გამოც პაციენტებს ვეღარ ემსახურებიან. გუშინ დასაქმებულებმა პროფკავშირებთან ერთად გარკვეულ შედეგს მიაღწიეს. დამსაქმებელმა აიღო ვალდებულება სახელფასო დავალიანების ნაწილი გაისტუმროს 10 დღის ვადაში. თუ დღეს გაზისა და ელექტროენერგიის მიწოდება აღდგება, ცენტრი მუშაობასაც განაახლებს“, - ნათქვამია პროფკავშირების მიერ გავრცელებულ განცხადებაში.