„ევროპული საქართველო“ თაფლის რუსეთიდან შესყიდვას მიუღებლად მიიჩნევს

„ევროპული საქართველოს“ განცხადებით, პარტიას შინაგან საქმეთა და თავდაცვის სამინისტროების მიერ, მილიონ ლარზე მეტი ღირებულების 73 ტონა თაფლის რუსეთიდან შესყიდვის ფაქტი, კატეგორიულად მიუღებლად და მორალურად გაუმართლებლად მიაჩნია.

„მაშინ, როცა ჩვენი ქვეყნის ტერიტორიის 20% ოკუპირებულია რუსეთის მიერ, რომელმაც ამ ტერიტორიებზე განახორციელა ეთნიკური წმენდა და სიცოცხლეს გამოასალმა ჩვენი მოქალაქეები, ოკუპანტი სახელმწიფოსგან რაიმე პროდუქციის შეძენა გადასახადის გადამხდელთა ფულით, მითუმეტეს ჩვენი პოლიციელების და ჯარისკაცების საკვებად გამოსაყენებლად, არის არასწორი გზავნილი საქართველოს საზოგადოების და საერთაშორისო თანამეგობრობის მიმართ.

ამასთან, ეჭვს იწვევს ის ფაქტი, რომ ტენდერი გამოცხადებული იყო მარცვლეული კულტურების შესყიდვასთან ერთად და თაფლის ქართველი მწარმოებლებისთვის შეუმჩნეველი დარჩა. ასევე, აღსანიშნავია, რომ საქართველოს საბითუმო ბაზარზე თაფლი ტენდერში დაფიქსირებულ ფასზე მნიშვნელოვნად ნაკლებ ფასადაა ხელმისაწვდომი“, - ნათქვამია „ევროპული საქართველოს“ განცხადებაში.