გვეგონა, რომ მსგავსი სიბინძურეები და მსგავსი საშინელებები წარსულს ჩავაბარეთ, - ამის შესახებ ჟურნალისტებს ფრაქცია “ქართული ოცნების “ დეპუტატმა ნუკრი ქანთარიამ პირადი ცხოვრების ამსახველი კადრების გავრცელების საკითხზე საუბრისას განაცხადა.
“ყველამ უნდა შეწყვიტოს საუბარი იმაზე, რომ თუ ეს კადრები არსებობს, მაშინ უნდა გამოიძიონ - თუ არსებობს კი არა, ნამდვილად არსებობს! რადგან ეს კადრები არსებობს, სასწრაფოდ უნდა შეიცვალოს გამოძიების ტემპი! უახლოეს ხანში მე ველოდები პასუხებს, რადგან მსგავსი სიბინძურეები და მსგავსი საშინელებები, ჩვენ გვეგონა, რომ წარსულს ჩავაბარეთ, მაგრამ ახლაც შიგადაშიგ იწყებს ამოტივტივებას”, - განაცხადა ქანთარიამ.
მისივე თქმით, გამოძიებამ უნდა დაადგინოს, ვის შეეძლო ამ კადრების გავრცელება და ვინც ამას აკეთებს, ის ოცნების მტერია. “ამ ეტაპზე მე მინდა გამოვრიცხო, რომ ეს გუნდის შიგნიდან მოდის, თუმცა, გამოძიება რასაც იტყვის, ბუნებრივია, მე იმას დავეყრდნობი”,- აღნიშნა დეპუტატმა.