"გაერთიანებული ოპოზიციის" პრეზიდენტობის ყოფილი კანდიდატი გრიგოლ ვაშაძე პირადი ცხოვრების ამსახველი ჩანაწერების გავრცელების საქმეზე მათი პარტიის მხარდამჭერების დაკავების ფაქტს გამოეხმაურა.

გრიგოლ ვაშაძემ ქუთაისში გამართულ ბრიფინგზე განაცხადა, რომ ხელისუფლება თავისი დანაშაულის გადაფარვის მიზნით უდანაშაულო ადამიანებს აკავებს.

მისი განცხადებით, მალე ყველა რეალური დამნაშავის სახელი გახდება ცნობილი.

"ბოლო რამდენიმე დღის განმავლობაში რაც ხდება, ამაზე სამართლებრივ და პოლიტიკურ ჭრილში საუბარი შეუძლებელია, ივანიშვილის რეჟიმმა საკუთარი დანაშაულების რეკორდი დაამყარა და ხელისუფლება იმით არის დაკავებული, რომ თავისივე წევრს ებრძვის ბინძური მეთოდით. აქვეყნებენ ფარულ ჩანაწერებს და ვირუსივით ავრცელებენ, თავიანთ დანაშაულს კი უდანაშაულო ადამიანებს აბრალებენ და აკავებენ. გაზის გაჟონვით რამდენიმე ადამიანი გარდაიცვალა და არავის ადარდებს ადამიანის სიცოცხლე. რაც ბოლო დროს ხდება ხელისუფლებაში, ეს არ არის სიძლიერის ნიშანი, ეს სიბინძურის ნიშანია. ძალიან მალე ყველა დამნაშავის სახელი გახდება ცნობილი," - განაცხადა გრიგოლ ვაშაძემ.