სახელმწიფო უსაფრთხოების სამსახურის წარმომადგენლის, გერმანე გვარამიას განცხადებით, თბილისის საქალაქო სასამართლომ კანონიერი გადაწყვეტილება მიიღო, რომლის მიხედვითაც, მოსამართლემ სუს-ის წინააღმდეგ მაჩალიკაშვილების ადმინისტრაციული სარჩელი არ დააკმაყოფილა.

„სასამართლოს მიერ მიღებულ გადაწყვეტილებას ვეთანხმებით და მიგვაჩნია, რომ კანონიერი გადაწყვეტილება მიიღო. საქმის მასალებით რაც დამტკიცდა, აღნიშნულთან დაკავშირებით სასამართლომ გადაწყვეტილება მიიღო. სასამართლო პროცესზე საქართველოს სახელმწიფო უსაფრთხოების სამსახურმა განმარტა თავისი პოზიცია", - განაცხადა გვარამიამ.

სახელმწიფო უსაფრთხოების სამსახურის წინააღმდეგ თემირლან მაჩალიკაშვილის მშობლების, აიზა მარგოშვილისა და მალხაზ მაჩალიკაშვილის ადმინისტრაციული სარჩელი თბილისის საქლაქო სასამართლომ არ დააკმაყოფილა. მაჩალიკაშვილის ოჯახის წევრები სუს-ს მათი გარდაცვლილი შვილის მიმართ უდანაშაულობის პრეზუმფციის დარღვევას ედვებოდნენ, ისინი მორალური ზიანის ანაზღაურებასაც ითხოვდნენ.

მოსამართლის განმარტებით, სუს-ის მიერ გაკეთებული განცხადებებით უდანაშაულობის პრეზუმფცია არ დარღვეულა.