პარლამენტის თავმჯდომარის ირაკლი კობახიძის ინფორმაციით, პარლამენტი 22 მარტს პრემიერ-მინისტრს ინტერპელაციის წესით მოუსმენს.

როგორც კობახიძემ აღნიშნა, ასეთი მოსმენა საქართველოს პარლამენტარიზმის ისტორიაში პირველად მოხდება. მან აქვე დასძინა, რომ პარლამენტის საზედამხედველო ფუნქცია რადიკალურად არის გაზრდილი.

ინტერპლაცია საქართველოს კონსტიტუციითა და ახალი რეგლამენტით განსაზღვრული ფორმაა. კერძოდ, პარლამენტის წევრთა არანაკლებ შვიდკაციან ჯგუფს, ფრაქციას უფლება აქვს, ინტერპელაციის წესით შეკითხვით მიმართოს მთავრობას, პარლამენტის წინაშე ანგარიშვალდებულ სხვა ორგანოს, მთავრობის წევრს.

შეკითხვის ადრესატი ვალდებულია შეკითხვას პირადად უპასუხოს პარლამენტის პლენარულ სხდომაზე, აგრეთვე შეკითხვაზე პასუხი წერილობითი ფორმით წარუდგინოს პლენარულ სხდომას.

პრემიერ-მინისტრი ინტერპელაციის წესით პარლამენტში ფრაქცია “ნაციონალურმა მოძრაობამ“ დაიბარა.